Uppsagnarfrestur er sem hér segir:

• Á fyrstu þremur mánuðum í starfi (reynslutími), 1 vika. 
• Á  fjórða til sjötta mánuði í starfi, 1 mánuður, uppsögn skal vera um mánaðamót.
• Eftir sex mánaða starf, 3 mánuðir, uppsögn skal vera um mánaðamót.
• Eftir 10 ára starf hjá sama fyrirtæki öðlast starfsmaður við;
  55 ára aldur 4 mánaða uppsagnarfrest, uppsögn skal vera um mánaðamót.
  60 ára aldur - 5 mánaða uppsagnarfrest, uppsögn skal vera um mánaðamót.
  63 ára aldur - 6 mánaða uppsagnarfrest, uppsögn skal vera um mánaðamót.

Starfsmenn sem hafa öðlast fjögurra til sex mánaða uppsagnarfrest skv. kjarasamningi, geta sagt starfi sínu lausu með þriggja mánaða fyrirvara en að öðru leyti er uppsagnarfrestur gagnkvæmur. Skylt er að vinna lögbundinn uppsagnarfrest, nema um annað sé sérstaklega samið. Allar uppsagnir skulu vera skriflegar og gerðar á sama tungumáli og ráðningarsamningur starfsmanns.

Þinn réttur

Það er mikilvægt að þú þekkir rétt þinn þegar kemur að uppsögn, hvort sem þú segir upp eða færð uppsagnarbréf frá vinnuveitanda. Kjarasvið VR hefur tekið saman ítarlegar upplýsingar um þinn rétt.

Það er mikilvægt fyrir starfsmenn að standa rétt að því að segja upp störfum. Í uppsagnarbréfi þurfa að koma fram ákveðnar upplýsingar og dagsetningar verða að vera réttar.

Dæmi
Starfsmaður sem hefur þriggja mánaða uppsagnarfrest segir upp 31. mars árið 2008. Hann miðar við starfslok, eða síðasta starfsdag, þann 30. júní 2008.

Einnig er mikilvægt að starfsmaðurinn haldi eftir eintaki af uppsagnarbréfinu. Því er ráð að prenta bréfið út í tvíriti og láta vinnuveitanda kvitta fyrir móttöku bréfsins á það eintak sem starfsmaðurinn heldur eftir.

Sjá dæmi um útfyllt uppsagnarbréf starfsmanns.

Fallist atvinnurekandi ekki á ósk starfsmanns um skriflegar skýringar, á starfsmaður innan fjögurra sólarhringa rétt á öðrum fundi með vinnuveitanda um ástæður uppsagnar að viðstöddum trúnaðarmanni sínum eða öðrum fulltrúa stéttarfélags síns ef starfsmaður óskar þess.