Félagsgjald og aðild

Félagsgjald til VR er 0,7% af heildarlaunum. Atvinnurekendur greiða mótframlag til félagsins - sjá nánar hér. Félagsgjald er innheimt af Lífeyrissjóði verzlunarmanna - sjá nánar hér.

Greiðslur í lífeyrissjóð eru 4% af hálfu félagsmanns en 10% af hálfu atvinnurekanda. Í séreignarsjóð getur félagsmaður greitt 2-4%, mótframlag atvinnurekanda er 2%. Endurhæfingarsjóður er 0,10% sem reiknast af launum og greiðist í þann lífeyrissjóð sem launamaður greiðir í.

Félagsgjald VR og iðgjöld í sjóði

Félagsmenn hafa rétt til:

  • upplýsinga um réttindi og skyldur,
  • aðstoðar við túlkun kjarasamninga,
  • aðstoðar við ráðningarsamninga,
  • aðstoðar við útreikninga á launum og innheimtu,
  • aðstoðar ef upp kemur ágreiningur á vinnustað,
  • lögfræðiaðstoðar tengda kjaramálum,
  • styrkja til forvarna, trygginga og endurhæfingar,
  • niðurgreiðslu á námi og námskeiðum,
  • aðgangs að orlofshúsum (á 21sta aldursári),
  • trygginga í veikindum í gegnum sjúkrasjóðinn*

*Ath. Samkvæmt gr. 9.6 í reglugerð um Sjúkrasjóð VR geta menn þó ekki skapað sér réttindi í sjóðnum með félagsgjaldsgreiðslum til VR af atvinnuleysisbótum nema þeir hafi sannanlega verið félagar í VR þegar þeir misstu vinnu og sóttu um atvinnuleysisbætur.

Aðild að VR

Þrátt fyrir að VR sé fyrst og fremst launþegafélag er fleirum gefinn kostur á aðild að félaginu. Þeir sem hætta störfum á vinnumarkaði vegna atvinnuleysis eða örorku geta verið áfram félagsmenn og eru þá félagsgjöld dregin af bótagreiðslum þeirra.

Þeir sem hætta störfum 67 ára eða eldri, og hafa verið fullgildir í samfellt 5 ár áður en þeir láta af störfum, teljast fullgildir eldri félagar til æviloka. 5 samfelld ár teljast greidd þegar skilað hefur verið iðgjöldum fyrir a.m.k. 50 mánuði á 5 ára tímabili.

Félagsmenn sem láta af störfum við 65 ára aldur, og hafa verið fullgildir í samfellt 5 ár áður en þeir láta af störfum, hafa heimild til þess að greiða félagsgjald til VR af ellilífeyrisgreiðslum til 67 ára aldurs svo þeir haldi fullum réttindum eftir það.

Einnig geta þeir sem hverfa frá störfum um stundarsakir vegna náms eða veikinda nýtt sér áunninn rétt við inngöngu að nýju skv. nánari reglum.

Sjálfstætt starfandi, þ.e. þeim sem ber að áætla sér reiknað endurgjald samkvæmt ákvörðun skattayfirvalda, auk þeirra sem skráðir eru sem launamenn hjá eigin fyrirtæki, geta verið í VR. Þeir þurfa að standa skil á öllum greiðslum og iðgjöldum til Lífeyrissjóðs verzlunarmanna. Þar sem sjálfstætt starfandi, og/eða fjölskyldumeðlimur rekstraraðila, teljast hafa ráðandi stöðu skulu iðgjöld þeirra ávallt vera greidd og í skilum ef sækja á þjónustu til VR eða réttindi í sjóðum félagsins. Fyrir nánari upplýsingar, vinsamlega hafið samband við þjónustuver VR í síma 510 1700 eða í tölvupósti til vr@vr.is.

Hvað er lágmarksfélagsgjald hátt ?

Til að sjá lágmarksfélagsgjald veldu mánuð.

Lágmarksfélagsgjald

Til að öðlast full félagsréttindi þarf að greiða mánaðarlegt félagsgjald (0,7% af heildarlaunum). Það skal ekki vera lægra en sem svarar til 0,3% byrjunarlaunum 18 ára afgreiðslufólks, samkvæmt launataxta VR, eins og þau eru á hverjum tíma. Félagsgjald tekur því breytingum í samræmi við umsamdar breytingar á launataxta VR. Þegar rætt er um lágmarksfélagsgjald er miðað við gjald samtals í eitt ár, eða undangengna 12 mánuði (sjá að ofan lágmarksfélagsgjald á ársgrundvelli).

Félagsmenn sem ekki hafa náð lágmarksfélagsgjaldi eiga rétt á aðstoð við kjaramál og réttindi í sjóðum félagsins í hlutfalli við greiðslur. Til þess að viðhalda fullgildum félagsrétti í VR þurfa félagsgjaldsgreiðslur að berast reglulega. Ef ekkert félagsgjald er greitt í þrjá mánuði samfellt fellur viðkomandi af félagsskrá. Hægt er að ná aftur fullgildingu frá þeim mánuði sem næsta félagsgjaldsgreiðsla berst, ef lágmarksfélagsgjaldi er náð undangengna 12 mánuði.

Þeir sem hætta störfum 67 ára eða eldri, og hafa verið fullgildir í samfellt 5 ár áður en þeir láta af störfum, teljast fullgildir eldri félagar til æviloka. 5 samfelld ár teljast greidd þegar skilað hefur verið iðgjöldum fyrir a.m.k. 50 mánuði á 5 ára tímabili.

Aðild öryrkja að VR

Samkvæmt 3. gr. laga VR er öryrkjum heimilt að greiða 0,7% félagsgjald af örorkubótum sem renni í sjóði félagsins til að tryggja réttindi þeirra úr sjóðunum. Skilyrði sem öryrki þarf að uppfylla til að öðlast þennan rétt er að hann hafi verið félagsmaður VR óslitið í 5 ár áður en til örorku kom og að árlegar greiðslur félagsgjalds af örorkubótum nái lágmarksfélagsgjaldi hverju sinni. Þetta á þó aðeins við um örorkubætur sem greiddar eru hjá lífeyrissjóðum sem bjóða milligöngu um að skila félagsgjöldum til stéttarfélaga.

Nánari upplýsingar hjá þjónustuveri VR í síma 510 1700 eða með tölvupósti til vr@vr.is.