VR tryggir málsókn Gráa hersins

Fréttir - 26.05.2020
VR tryggir málsókn Gráa hersins

VR hefur ákveðið að gerast bakhjarl Málsóknarsjóðs Gráa hersins vegna málsóknar gegn Tryggingastofnun og íslenska ríkinu. Dómsmálið er rekið til þess að ná fram þeirri niðurstöðu að skerðingar Tryggingastofnunar á ellilífeyri vegna greiðslna úr skyldubundnum atvinnutengdum lífeyrissjóðum standist ekki ákvæði stjórnarskrár og mannréttindasáttmála.

VR hefur stutt málsóknina frá upphafi og var fyrst til þess að leggja fé til Málsóknarsjóðsins. Ljóst er að fram undan er löng barátta við ríkið fyrir dómstólum. Til þess að tryggja að reka megi málið af fullum krafti allt til enda ákvað stjórn VR á fundi sínum 13. maí sl. að gerast bakhjarl Málsóknarsjóðsins og ábyrgjast kostnað af málarekstrinum.

Ákvörðun VR gefur Málsóknarsjóði Gráa hersins mikinn kraft enda getur Grái herinn nú sett alla sína krafta í baráttuna og að kynna málstaðinn.