Þekkir þú úrræðin?

Síðustu ár hefur vitund um kulnun farið vaxandi og úrræði eru fleiri en þau hafa verið.
Í alvarlegum tilfellum er ráðlegt að leita til fagfólks, sálfræðinga, geðlækna eða annarra meðferðaraðila. En það er mikilvægt að hafa vaðið fyrir neðan sig og geðheilsan er okkur öllum mikilvæg. Sjálfsmeðvitund um álagsþætti og góð færni í streituvörnum er frábær forvörn og geðheilsuefling.

 

Forvarnir

Best er að vinna gegn streitu með forvörnum svo hún komist ekki á alvarlegt stig. Það er gert með forvarnarfræðslu. Þá er kennd aukin meðvitund um streituvaldana og veitt þekking um hættumerkin, þ.e. fyrstu einkenni kulnunar og sjúklegrar streitu.

Við streituvarnir er sérstaklega mikilvægt að gæta að nægilegri andlegri og líkamlegri slökun og hæfilegri hvíld.

Hreyfing

Ekki er ráðlegt að hætta í ræktinni ef álag er mikið en skynsamlegt getur verið að draga úr þyngdum og stytta æfingarnar. Léttari þjálfun eins og ganga og sund henta oft mjög vel þegar álag er mikið. Mikilvægt er að hreyfing sé regluleg þrisvar til fjórum sinnum í viku.

Matarræði

Matarræði skiptir miklu máli varðandi streitu og álag. Hollt fæði og reglulegir matartímar gefa góða næringu og besta líðan. Margir hafa sterka tilhneigingu til að borða óreglulega og auka sykurnotkun þegar álagið vex.

Meðferð streitu

Ef kulnun er komin á alvarlegt stig eða sjúkleg streita hefur verið greind er mikilvægt að leita sér ráðgjafar og lækninga.

Læknar, sálfræðingar og margar aðrar heilbrigðisstéttir veita ráðgjöf og meðferð og geðlæknar og margir sálfræðingar hafa sérþekkingu á greiningu og meðferð sjúklegrar streitu og annarra streitutengdra sjúkdóma. 
 

Fimm atriði sem allir geta tileinkað sér til að koma í veg fyrir kulnun:

1. Hvíldu þig

Mundu að þú átt rétt á 11 klukkustunda samfelldum hvíldartíma á hverjum sólarhring. Notaðu hann til að hvílast, nærast og njóta lífsins.

2. Gerðu vinnuna betri

Skipuleggðu vinnuna eins vel og þú getur og ekki taka að þér verkefni sem þú ræður ekki við. Skiptu með þér verkum. Reyndu að finna tilgang í því sem þú tekur þér fyrir hendur. Hafðu vinnuaðstöðuna þægilega og vistlega.

3. Hreyfðu þig daglega

Það er mikilvægt að kíkja eitthvað út og njóta dagsbirtunnar á hverjum degi, sérstaklega í skammdeginu.

4. Sparaðu tækin

Tölvan og síminn geta truflað mann meira en maður tekur eftir. Það getur reynst vel að taka sér pásu frá tækninni á hverjum degi.

5. Hlúðu að undirstöðunum

Mundu hvað skiptir þig mestu máli í lífinu og taktu frá tíma til að vera með vinum og ástvinum eða til að sinna áhugamálum.

Styrkir og sjóðir VR

Félagsmenn VR geta sótt um styrki í bæði VR varasjóð og úr Starfsmenntasjóðum.

Í VR varasjóð geta félagsmenn sótt um t.d. styrk vegna líkamsræktar eða endurhæfingar.

Í starfsmenntasjóði geta félagsmenn VR sótt um styrki vegna
t.d. tómstundanáms.