Arnþór Sigurðsson

Fæðingardagur og -ár
9. apríl 1966.

Félagssvæði
Reykavík og nágrenni.

Vinnustaður, starf og menntun
Prógramm ehf., forritari. Ég hef unnið ýmis störf í matvælaiðnaði, bæði í kjötvinnslum og verslun. Söðlaði síðan um og hóf störf í tölvugeiranum. Hef starfað sem forritari hjá Prógramm ehf. síðastliðin tíu ár. Er menntaður kjötiðnaðarmaður og var jafnframt við nám á tölvubraut Iðnskólans í Reykjavík ásamt því að sitja nokkur námskeið við Háskólann í Reykjavík í tölvunarfræði.


Reynsla af félagsstörfum

Reynsla mín af félagsstörfum er margvísleg. Þegar ég var í iðnnámi tók ég virkan þátt í kjarabaráttu iðnnema, bæði með félögum mínum í iðnnemasambandinu sem og á mínum vinnustað. Eftir iðnnámið hélt ég áfram þátttöku í kjaramálum með Félagi Íslenskra Kjötiðnaðarmanna í nokkur ár. Einnig hef ég starfað innan íþróttahreyfingarinnar, sem sjálfboðaliði og einnig setið í stjórn frjálsíþróttadeildar Breiðabliks, var formaður Frjálsíþróttasamband Íslands í tvö ár og hef einnig setið í aðalstjórn Breiðabliks. Af öðrum félagsstörfum þá hafa sveitarstjórnarmál tekið drjúgan tíma. Þar hef ég haft tækifæri til þess að kynnast margvíslegum nefndarstörfum á vegum Kópavogsbæjar. Lengst af hef ég setið í Félagsmálaráði Kópavogsbæjar og síðar í Velferðarráði Kópavogsbæjar ásamt því að taka sæti sem varamaður í bæjarstjórn Kópavogs og bæjarráði Kópavogs. Síðust þrjú ár hef ég setið í stjórn VR og tekið þátt í húsnæðisnefnd, framkvæmdastjórn sjúkrasjóðs og laganefnd svo eitthvað sé nefnt. VR er stórt og öflugt félag og það skiptir máli hvaða fólk velst til stjórnarstarfa. Mig langar að taka þátt áfram í stjórn og vinna að framfaramálum fyrir hönd VR félaga og óska því eftir endurkjöri þessum kosningum.


Helstu áherslur

  • Að standa vörð um réttindi og hagsmuni allra félagsmanna.
  • Enn frekari stytting vinnuvikunnar.
  • Launamun kynjanna verður að útrýma.
  • Lægstu laun verði miðuð við að fólk geti lifað með reisn í samfélaginu.
  • Hækkun persónuafsláttar.
  • Gerður verði samfélagssáttmáli verkalýðshreyfingarinnar um að útrýma fátækt í landinu.
  • Að lífeyrissjóðir fjárfesti í samfélagsverkefnum en ekki í bara atvinnulífinu.
  • Að lífeyrissjóðirnir verði markvisst dregnir út úr fjárfestingum í íslensku atvinnulífi.
  • VR haldi áfram að vinna ötullega að húsnæðismálum með öðrum verkalýðsfélögum og skapa þannig heilbrigðan leigumarkað fyrir almenning með lágmarksávöxtun.
  • Barist verði fyrir því að húsnæðisverð verði fjarlægt út úr vísitölum.

Ég er ánægður með forystu Ragnars Þórs Ingólfssonar formanns VR. Hann hefur blásið nýju lífi í verkalýðshreyfinguna og gjörbylt ásýnd og áherslum félagsins með góðum árangri. Ég hvet því félaga mína í VR að styðja Ragnar Þór í kosningu til fomanns.