Framboðsfrestur

Samkvæmt 20. gr. laga VR auglýsir kjörstjórn félagsins eftir einstaklingsframboðum í stjórn félagsins og listaframboðum í trúnaðarráð.

Auglýsing eftir framboðum birtist í dagblöðum föstudaginn 28. janúar 2022 og á vef félagsins.

Framboðsfrestur rennur út kl. 12:00 á hádegi mánudaginn 7. febrúar 2022.

Um hvað verður kosið?

20. grein laga VR fjallar um kosningu formanns, stjórnar, varastjórnar og trúnaðarráðs. Í allsherjarkosningu árið 2022 verður annars vegar kosið til sjö sæta í stjórn og þriggja til vara. 

Hins vegar er um að ræða listaframboð fyrir 41 sæti í trúnaðarráð. Til að listi vegna trúnaðarráðs sem borinn er fram gegn lista uppstillingarnefndar sé löglega fram borinn þarf skrifleg meðmæli 365 VR félaga sem og skriflegt samþykki frambjóðenda á listanum.

Í lögunum segir að stjórn og trúnaðarráð skuli stilla upp 41 manns lista til trúnaðarráðs til tveggja ára og hefur uppstillinganefnd stjórnar og trúnaðarráðs auglýst eftir einstaklingsframboðum á listann. Berist önnur listaframboð til trúnaðaráðs verður kosið milli lista.

Athugið að framboð til stjórnar ógildir framboð til trúnaðarráðs.

Hvernig á að bjóða sig fram?

Skv. 5. gr. laga VR nýtur allt fullgilt félagsfólk VR kjörgengis til trúnaðarstarfa innan félagsins, með þeim undantekningum sem getið er um í 3. gr. laganna en samkvæmt þeirri grein njóta unglingar 15 ára og yngri, sjálfstætt starfandi á vinnumarkaði og þau sem hætt eru störfum vegna aldurs eða örorku ekki kjörgengis.

Þá er vakin athygli á að skv. 11. gr. laga VR skulu stjórnarmenn vera fjár síns ráðandi, uppfylla almenn hæfisskilyrði og mega ekki á sl. 5 árum hafa hlotið fangelsisdóm fyrir refsiverðan verknað. Stjórnarmenn mega ekki eiga meira en 5% hlut í hlutafélagi sem er í atvinnurekstri á starfssviði félagsins. Frambjóðendur til stjórnar þurfa því á grundvelli þessa ákvæðis að láta fylgja framboðum sínum trúnaðaryfirlýsingu um að þeir uppfylli þessi skilyrði.

Skrifleg meðmæli 15 VR félaga þarf vegna einstaklingsframboðs til stjórnar. Til að listi til trúnaðarráðs sem borinn er fram gegn lista uppstillingarnefndar sé löglega fram borinn þarf skrifleg meðmæli 365 VR félaga sem og skriflegt samþykki frambjóðenda á listanum. Fyrirmyndir að meðmælendablöðum má nálgast hér:

Vakin er athygli á því að framboðum þurfa að fylgja upplýsingar um nafn og kennitölu frambjóðenda. Enn fremur óskar kjörstjórn eftir því að framboðum fylgi upplýsingar um símanúmer og netfang frambjóðenda til stjórnar og forsvarsmanna lista.

Skrifleg meðmæli 15 VR félaga þarf vegna einstaklingsframboðs til stjórnar og varastjórnar.

Framboðsfrestur er til kl. 12:00 á hádegi, mánudaginn 7. febrúar 2022.

Framboðum ásamt fullnægjandi fjölda meðmælenda skal skila á skrifstofu VR, Húsi verslunarinnar, Kringlunni 7, 1. hæð, merkt Kjörstjórn VR.

Vinsamlega athugið: Þar sem skrifstofa félagsins er lokuð vegna Covid-19 þarf að hringja í síma 510-1700 þegar komið er að dyrum skrifstofu og munu framboðsgögn verða sótt fram fyrir dyr.

Frekari upplýsingar má fá hjá kjörstjórn með því að hringja í síma VR 510 1700 eða senda tölvupóst á kjorstjorn@vr.is.

28. janúar 2022
Kjörstjórn VR