Deildir VR

Tvær deildir eru starfandi innan VR, á Austurlandi og í Vestmannaeyjum. Hlutverk deildar er meðal annars að vinna að sameiginlegum hagsmunum starfsmanna í starfsgreinum / atvinnugreinum / landssvæðum, stuðla að fræðslu þeirra og fjalla um kjaramál (sjá 15. gr. laga VR).

Saga verslunarmannafélaga Austurlands og Vestmannaeyja

Saga verslunarmannafélags Austurlands

Verslunarmannafélag Reyðarfjarðar- og Egilsstaðakauptúns var stofnað 5. maí 1960. Björn Eysteinsson var fyrsti formaður félagsins. Snemma á áttunda áratug síðustu aldar fór fólk í öðrum þéttbýliskjörnum á Austurlandi að ganga í félagið og var nafni þess breytt í Verslunarmannafélag Austurlands árið 1972. Ári síðar var félagssvæðið stækkað og náði yfir Múlasýslurnar báðar. Undir lok árs 1982 opnaði félagið skrifstofu og jókst þjónusta við félagsmenn til muna við það.

Í maí árið 2008 var tillaga um sameiningu við VR samþykkt á aðalfundi félagsins og í kjölfarið var stofnuð sérstök deild VR á Austurlandi. Formaður deildarinnar var kosin Kristín M. Björnsdóttir sem gegndi formennsku í Verslunarmannafélagi Austurlands frá árinu 1999 til ársins 2008.

Saga verzlunarmannafélag Vestmannaeyja

Verzlunarmannafélag Vestmannaeyja var stofnað 22. júní 1944. Félagið gekk í Alþýðusamband Íslands í október sama ár. Síðasti fundur félagsins var haldinn árið 1950 og var félagið svo lagt niður. þann 1. júní 1962 var Verslunarmannafélag Vestmannaeyja svo endurreist fyrir tilstuðlan Landssambands íslenzkra verzlunarmanna og var fyrsti formaður þess Stefán Björnsson.

Á árunum 1973-74, þegar Vestmannaeyjagosið var, kom afturkippur í starf félagsins en það komst aftur á skrið ári síðar. Árið 1993 opnaði félagið skrifstofu og efldist starfsemin við það.

Í október 2007 var tillaga um sameiningu við VR samþykkt  á aðalfundi Verslunarmannafélags Vestmannaeyja og var jafnframt samþykkt að stofna sérstaka deild VR í Vestmannaeyjum. Fyrsti formaður deildarinnar var Guðrún Erlingsdóttir sem áður var formaður Verslunarmannafélags Vestmannaeyja. Núverandi formaður deildar VR í Vestmannaeyjum er Bjarni Daníelsson sem var kosinn árið 2015.

Upplýsingar fengnar úr bókinni Með oddi og egg, stéttarfélög á Íslandi eftir Ingólf Ingvarsson og Samúel Inga Þórisson.

Deildir VR

Deild VR á Austurlandi

  • Skrifstofa VR á Austurlandi er til húsa að Kaupvangi 3B á Egilsstöðum.
  • Skrifstofan er opin kl. 8:30 - 16:30.
  • Formaður deildar VR á Austurlandi er Kristín María Björnsdóttir.
  • Aðrir stjórnarmenn eru Eygló Friðriksdóttir og Gunnar Heiðberg Gestsson. Varamenn stjórnar eru Anna Karlsdóttir, Ellen Rós Baldvinsdóttir og Ingunn Kjartansdóttir.

Deild VR í Vestmannaeyjum

  • Skrifstofa VR í Vestmannaeyjum er til húsa að Strandvegi 54.
  • Skrifstofan er opin kl. 10:00 - 12:00 og 13:00 - 15:00.
  • Formaður deildar VR í Vestmannaeyjum er Bjarni Daníelsson.
  • Aðrir stjórnarmenn eru Ásta Sigrún Gunnarsdóttir og
    Kristinn Guðmundsson.
    Varamenn eru Sigurjón Lárusson
    og Sigríður Stefánsdóttir.