Almennar fréttir - 10.03.2026

Nær helmingur félagsfólks VR vill nýjan gjaldmiðil

Jafnmargir VR félagar eru hlynntir og andvígir aðild Íslands að Evrópusambandinu eða 38%. Rétt innan við helmingur - eða 47% - er hlynntur upptöku nýs gjaldmiðils. Þetta má lesa úr niðurstöðum könnunar sem gerð var meðal meðal félaga í VR fyrr á þessu ári.

Í könnuninni voru þrjár spurningar lagðar fyrir svarendur:

1. Hversu hlynnt(ur) eða andvíg(ur) ert þú að Ísland hefji aftur aðildarviðræður við Evrópusambandið
2. Hversu hlynnt(ur) eða andvíg(ur) ert þú aðild Íslands að Evrópusambandinu?
3. Hversu hlynnt(ur) eða andvíg(ur) ert þú upptöku nýs gjaldmiðils á Íslandi?

41% vill hefja aftur aðildarviðræður

Marktækt meiri stuðningur er með upptöku nýs gjaldmiðils en aðildaviðræðum eða inngöngu í ESB. Annars eru fylkingar nokkuð jafnar. Um 41% sögðust hlynnt því að hefja aftur aðildarviðræður, 36% voru því andvíg en 23% merktu við hvorki hlynnt né andvíg. Eins og fyrr sagði voru 38% hlynnt aðild að Evrópusambandinu og jafnmargir á móti en 24% sögðust hvorki hlynnt né andvíg. Þá sögðu 47% hlynnt upptöku nýs gjaldmiðils en 29% voru því andvíg. Eins og í hinum tveimur spurningunum merkti um fjórðungur við valmöguleikann hvorki né.

Um könnunina

VR gerir reglulega kannanir meðal félagsfólks og er þessi könnun hluti þess. Hún var gerð í janúar 2026 meðal úrtaks greiðandi félagsfólks, 18 ára og eldri, sem hafði skráð netfang í félagakerfinu. Alls bárust 809 svör.