Reglugerð og starfsreglur Sjúkrasjóðs VR

Reglugerð Sjúkrasjóðs VR

1. gr. Nafn sjóðsins og heimili

1.1 Sjóðurinn heitir Sjúkrasjóður VR.

1.2 Sjúkrasjóður VR er stofnaður með tilvísun til laga nr. 19, 1. maí 1979.

1.3 Sjúkrasjóður VR er eign VR. Heimili hans og varnarþing er í Reykjavík.

2. gr. Verkefni sjóðsins

2.1 Verkefni sjóðsins er að veita félagsfólki VR fjárhagsaðstoð í veikinda-, slysa- og dánartilvikum.

2.2 Verkefni sjóðsins er ennfremur að vinna að fyrirbyggjandi aðgerðum er snerta starfsöryggi og heilsufar.

2.3 Sjóðurinn getur einnig varið fé til aðila sem vinna að bættu heilsufari.

2.4 VR er heimilt að taka að sér aðstoð við félagasamtök, sem um það semja, varðandi ofangreint verkefni.

2.5 Aðalfundi hverju sinni er heimilt að ákveða að hlutfall af iðgjaldi félagsfólks í Sjúkrasjóð VR renni inn í VR varasjóð og greiðist út samkvæmt reglugerð um VR varasjóð.

3.gr.

3.1 Heimilt er að stofna til samstarfs við önnur félög um rekstur sjúkrasjóða.

4. gr. Tekjur

4.1 Tekjur sjóðsins eru samningsbundin gjöld atvinnurekenda til sjóðsins skv. kjarasamningum VR á hverjum tíma sbr. 7. gr. laga nr. 19, 1. maí 1979.

4.2 Vaxtatekjur og annar arður.

4.3 Gjafir, framlög og styrkir.

4.4. Aðrar tekjur sem aðalfundur félagsins/sjóðsins kann að ákveða hverju sinni.

5. gr. Stjórn og rekstur

5.1 Stjórn VR er jafnframt stjórn sjóðsins og ber ábyrgð á úthlutunum og öðrum fjárreiðum sjóðsins.

5.2 Stjórn VR er heimilt að fela fimm aðilum framkvæmdastjórn sem fer með stjórn og eftirlit með afgreiðslu sjóðsins. Framkvæmdastjórn kýs sér formann.

5.3 Stjórnun sjóðsins skal vera í samræmi við almennar stjórnsýslureglur.

5.4 Fjárreiður og umsjón með sjóðnum annast skrifstofa VR.

5.5 Sjúkrasjóður VR greiðir allan kostnað, sem af rekstri hans leiðir.

5.6 Ávallt skulu liggja fyrir upplýsingar um rétt félagsmanns til greiðslu úr sjóðnum.

5.7 Stjórn sjóðsins setur nánari starfsreglur um greiðslur bóta og aðra starfstilhögun.

6. gr. Reikningar og endurskoðun

6.1 Reikningar sjóðsins skulu lagðir fram áritaðir af löggiltum endurskoðanda og félagslegum skoðunarmönnum félagsins fyrir aðalfund félagsins til afgreiðslu. Reikningsár sjóðsins er það sama og félagsins.

6.2 Endurskoðun ber að framkvæma af löggiltum endurskoðanda eða endurskoðunarfélagi í samræmi við góða endurskoðunarvenju sem í gildi er á hverjum tíma.

6.3 Í ársreikningi eða skýringum með honum skal sundurliða sérstaklega kostnað vegna hvers og eins bótaflokks.

7. gr. Úttekt óháðra eftirlitsaðila

7.1 Annað hvert ár skal framkvæmdastjórn sjóðsins fá óháðan tryggingafræðing eða löggiltan endurskoðanda til þess að meta framtíðarstöðu sjóðsins og hvort sjóðurinn geti staðið við skuldbindingar sínar.

7.2 Stjórn sjóðsins skal ávallt gæta þess að sjóðurinn geti staðið við skuldbindingar sínar.

8. gr. Ávöxtun sjóðsins

8.1. Heimilt er að ávaxta fé sjóðsins með eftirfarandi hætti:

a) í ríkisskuldabréfum, í skuldabréfum sem tryggð eru með ábyrgð ríkissjóðs,

b) með kaupum á markaðsskráðum verðbréfum,

c) í bönkum eða sparisjóðum,

d) í fasteignum tengdum starfsemi og markmiðum sjóðsins,

e) á annan þann hátt er stjórn sjóðsins metur tryggan.

9. gr. Réttur til styrkveitinga úr Sjúkrasjóði VR

9.1 Rétt til styrkveitinga úr sjóðnum eiga einungis þau sem verið er að greiða fyrir til sjóðsins þegar réttur til aðstoðar myndast og fullnægja eftirtöldum skilyrðum, samanber þó gr. 9.4, 9.6, 9.7 og 9.8.

9.2 Þau sem greitt hafa iðgjald til Sjúkrasjóðs VR fyrir einn mánuð skulu eiga rétt til greiðslna sjúkra- og slysadagpeninga en til þess að eiga rétt til annarra styrkja úr sjúkrasjóði, s.s. dánarbóta o.s.frv., þarf að hafa greitt iðgjald til Sjúkrasjóðs VR samfellt í a.m.k. 6 mánuði fyrir dagsetningu umsóknar. Heimilt er að dagpeningagreiðslur, styrkir og dánarbætur séu greidd m.v. starfshlutfall.

9.3 Sá aðili sem öðlast hefur rétt til greiðslu úr sjúkrasjóði eins verkalýðsfélags innan ASÍ eða BSRB öðlast rétt hjá Sjúkrasjóði VR, skv. 2. gr., eftir að greitt hefur verið vegna hans til sjóðsins í einn mánuð, enda hafði hann fram að því átt rétt hjá fyrra félaginu.

9.4
a) Almennt skapast ekki réttindi í Sjúkrasjóði VR með iðgjaldagreiðslum af fæðingarorlofsgreiðslum, nema hjá þeim sem voru félagar í VR þega þeir hófu töku fæðingarorlofs. Heimilt er þó að veita slík réttindi í Sjúkrasjóði VR þeim sem greitt hafa félagsgjald til VR í a.m.k. 36 mánuði af síðustu 60 mánuðum fyrir töku fæðingarorlofs.

b) Fæðingarorlof telst til vinnutíma og skerðir ekki rétt til bóta svo framarlega að greitt sé félagsgjald til VR af fæðingarorlofsgreiðslum.

9.5 Ef breytingar verða á greiddum iðgjöldum skömmu fyrir umsókn um styrkveitingu úr sjóðnum frá sjálfstætt starfandi eða fjölskyldumeðlimi rekstraraðila smærri fyrirtækja, er heimilt að stöðva greiðslu, ákveða annað viðmiðunartímabil til ákvörðunar bótafjárhæðar og að krefjast frekari gagna frá opinberum aðilum. Sama gildir um iðgjaldagreiðslur aftur í tímann og ef aðilar með stöðu sjálfstætt starfandi hafa nýlega gengið í félagið.

9.6 Framkvæmdastjórn sjóðsins er heimilt að veita styrki til sjóðsfélaga í formi forvarna- og endurhæfingarstyrkja og styrkja vegna sjúkra- og slysakostnaðar.

9.7 Styrkir og fjárframlög til stofnana og félagasamtaka skulu ákveðnir af stjórn sjóðsins hverju sinni skv. 2. gr.

9.8 Stjórn sjóðsins er heimilt að stofna til annarra bótaflokka vegna fæðingarorlofs, slysatrygginga og annarra heilsufarstrygginga.

10. gr. Dagpeningar

Sjúkrasjóðurinn greiðir dagpeninga ef launatekjur falla niður sökum veikinda eða slysa. Dagpeningar skulu, að viðbættum bótum almannatrygginga, greiðslum frá Sjúkratryggingum Íslands, greiðslum úr slysatryggingu launafólks eða annarri lögbundinni tryggingu, ekki nema lægri fjárhæð en 80% af meðaltali þeirra heildarlauna sem iðgjald hefur verið greitt af á síðustu 6 mánuðum. Við útreikning upphæðar dagpeninga skal miða við greiðslur til Sjúkrasjóðs VR síðustu 6 mánuði áður en launagreiðslur féllu niður. Hafi orðið verulegar breytingar á launum síðustu 6 mánuði er heimilt að meta tekjur sérstaklega og yfir lengra tímabil en þó aldrei lengra tímabil en 12 mánuði. Í þeim tilvikum þar sem félagi fær greiðslur fyrir sama slysa- og/eða veikindatímabil frá öðrum aðilum, svo sem greiðslur úr slysatryggingu launafólks, er heimilt að greiða mismun þeirrar bótafjárhæðar og 80% meðallauna ef sú upphæð er lægri en útreiknuð upphæð dagpeninga frá Sjúkrasjóði VR. Slysadagpeningar skv. grein þessari greiðast ekki vegna skaðabótaskyldra slysa og atvinnusjúkdóma, þ.m.t. slysa af völdum vélknúinna ökutækja.

Í upphafi félagsaðildar skal ekki greiða sjúkra- og slysadagpeninga í fleiri daga en greitt hefur verið fyrir viðkomandi félaga í sjúkrasjóðinn og er þá miðað við þann dag sem greiðslan hefst. Undanþegnir frá þessu eru þó umsækjendur sem verið hafa fullgildir félagar annars félags í ASÍ, sbr. gr. 9.3.

Einnig er heimilt að greiða dagpeninga ef launatekjur falla niður vegna veikinda barna sjóðsfélaga, yngri en 18 ára, og vegna langvarandi veikinda maka. Um það gildi að öðru leyti sömu reglur og að ofan greinir.

Eigi félagi rétt til endurhæfingarlífeyris hjá Tryggingastofnun ríkisins er heimilt að synja umsókn um sjúkra- eða slysadagpeninga. Nemi endurhæfingarlífeyrir lægri fjárhæð en sjúkra- eða slysadagpeningar er heimilt að greiða honum það sem upp á vantar í samræmi við sjúkradagpeningarétt hans.

Almennt skal það vera skilyrði fyrir greiðslu sjúkradagpeninga að umsækjandi fari í mat hvort starfsendurhæfing sé raunhæf. Ef starfsendurhæfing er metin raunhæf en umsækjandi hafnar henni er heimilt að fella niður dagpeningagreiðslur.

Fjöldi daga á greiðslutímabili er ákvarðaður af framkvæmdastjórn sjóðsins og staðfestur af stjórn VR og skal hann tilgreindur í starfsreglum sjóðsins hverju sinni. Greiðslutímabil getur aldrei verið styttra en sem nemur því lágmarki sem tilgreint er í gildandi viðmiðunarreglugerð fyrir sjúkrasjóði aðildarfélaga ASÍ.

Sá sem hefur fullnýtt rétt öðlast hann að nýju þegar greitt hefur verið fyrir hann til sjóðsins í 12 mánuði.

11. gr. Dánarbætur

VR greiðir dánarbætur við dauðsfall fullgildra félaga. Bótafjárhæðir fara eftir fjölskyldustærð og hvort viðkomandi var ennþá á vinnumarkaði og úthlutað samkvæmt gildandi starfsreglum Sjúkrasjóðs VR.

Heimilt er auk þess að greiða dánarbætur vegna barna félaga, yngri en 18 ára, eins og kveðið er á um í starfsreglum sjóðsins hverju sinni.

Heimilt er að greiða dánarbætur vegna andláts félagsfólks sem uppfyllir skilyrði sem eldri félagar skv. lögum VR. Réttur til dánarbóta fellur niður tveimur árum eftir að viðkomandi varð eldri félagi.

12. gr. Lausn frá greiðsluskyldu

Ef farsóttir, náttúruhamfarir eða önnur stór áföll geisa getur sjóðsstjórn leyst sjóðinn frá greiðsluskyldum sínum um stundarsakir. Einnig getur stjórn sjóðsins ákveðið að lækka um stundarsakir upphæð bóta, ef afkomu sjóðsins virðist hætta búin. Sé nauðsynlegt að skerða bætur vegna fjárhags sjóðsins skulu sjúkra- og slysadagpeningar skerðast minnst og njóta forgangs umfram aðra bótaflokka eða útgreiðslur.

13. gr. Fyrning bótaréttar

Réttur til bóta eða styrkja úr sjóðnum fyrnist sem hér segir:

Dagpeningar, slysa- og dánarbætur fyrnast á 24 mánuðum frá því að réttur til bóta myndast. Aðrar greiðslur og styrkir fyrnast á 12 mánuðum frá því að réttur til greiðslu skapaðist.

14. gr. Endurgreiðsla iðgjalda

Iðgjöld til sjóðsins endurgreiðast ekki.

15. gr. Upplýsingaskylda

15.1 Stjórn sjóðsins ber að upplýsa sjóðsfélaga um rétt þeirra samkvæmt reglugerð sjóðsins með kynningu á vefsíðu félagsins.

15.2 Stjórn sjóðsins ber að senda skrifstofu ASÍ árlega; ársreikning sjóðsins auk mats á framtíðarstöðu á 5 ára fresti.

15.3 Stjórn sjóðsins ber að senda skrifstofu ASÍ allar breytingar sem gerðar kunna að vera á þessari reglugerð.

16. gr. Bóta aflað með sviksamlegum hætti

16.1 Sá sem reynir að afla sér bóta með því að gefa rangar eða villandi upplýsingar, leynir eða lætur hjá líða að tilkynna um breytingar á högum sínum eða heilsu sem áhrif hefur á réttindi að fullu eða hluta samkvæmt þessari reglugerð skal missa rétt til bóta úr sjóðnum. Heimilt er að endurkrefja bótaþega um þegar greiddar bætur/dagpeninga sem aflað er með sviksamlegum hætti auk dráttarvaxta og innheimtukostnaðar. Réttur til dagpeninga og annarra bóta er háður því að endurgreiðsla ranglega greiddra bóta hafi farið fram.

16.2 Umsækjendur um sjúkradagpeninga þurfa að veita samþykki fyrir því að aflað sé upplýsinga úr staðgreiðsluskrá Skattsins á meðan umsókn um sjúkradagpeninga er í gildi.

17. gr. Úrskurðarnefnd VR

Heimilt er að kæra ágreining sem rís um túlkun reglna, grundvöll, skilyrði og fjárhæð dagpeninga, styrkja og annarra greiðslna úr sjóðnum til úrskurðarnefndar VR sem skipuð er af stjórn félagsins. Hlutverk úrskurðarnefndar VR er að kveða upp úrskurði um ágreiningsefni sem kunna að rísa á grundvelli laga og reglna VR.

Kærufrestur er þrír mánuðir frá því að viðkomandi félaga eða aðila er tilkynnt um ákvörðun Sjúkrasjóðs VR og nánar eftir gildandi reglum um úrskurðarnefnd VR hverju sinni.

18. gr. Breytingar á reglugerðinni

Breytingar á reglugerðinni verða aðeins gerðar á aðalfundi VR.
(Samþykkt af stjórn VR 14. ágúst 1979, á aðalfundi VR 23. mars 1980 með áorðnum breytingum 25. mars 1985, 16. mars 1998, 8. mars 1999, 26. mars 2001, 14. mars 2005, 24. apríl 2006, 26. mars 2007, 2. apríl 2009, 11. janúar 2011, 10. apríl 2012, 25. mars 2015, 27. mars 2019, 9. júní 2020, 24. mars 2021 og 25. mars 2026).

Ákvæði til bráðabirgða
Þrátt fyrir ákvæði þessarar reglugerðar um heimild til að synja umsókn/greiðslu um sjúkradagpeninga skulu þau ákvæði ekki taka gildi fyrr en gerð hefur verið breyting á lögum ASÍ sem heimilar samsvarandi ráðstöfun. Breytingar á gr. 9 og gr. 10 taka gildi 1. maí 2026.

Starfsreglur Sjúkrasjóðs VR

1. gr. Umboð framkvæmdastjórnar Sjúkrasjóðs VR

1.1 Stjórn VR felur 5 manna framkvæmdastjórn Sjúkrasjóðs VR stjórn og eftirlit afgreiðslu fyrir Sjúkrasjóð VR, skv. 5. gr. reglugerðar Sjúkrasjóðsins.

1.2 Framkvæmdastjórn Sjúkrasjóðs VR skal móta starfsreglur skv. gr. 5.7 reglugerðar Sjúkrasjóðsins, eftir því sem reynsla, starfsemi og fjárhagur sjóðsins gefa tilefni til. Starfsreglur sjóðsins skulu staðfestar af stjórn VR.

1.3 Framkvæmdastjórn skal fela skrifstofu VR almenna umsjón og daglega afgreiðslu mála.

2. gr. Sjúkra- og slysadagpeningar

2.1 Sjúkrasjóður VR greiðir sjúkra- eða slysadagpeninga ef félagsmaður verður, sökum veikinda eða slysa, óvinnufær og launatekjur hafa fallið niður. Veikindaréttur hjá atvinnurekanda, samkvæmt kjarasamningi, þarf að vera fullnýttur. Þó er heimilt að greiða sjúkradagpeninga þeim sem fara í áfengis- eða vímuefnameðferð, án þess að þeir hafi klárað veikindarétt hjá atvinnurekanda. Sjálfstætt starfandi í VR njóta sama réttar í veikindum og almennir launamenn og þurfa einnig að klára veikindarétt hjá eigin rekstri áður en þeir fá greiðslur úr Sjúkrasjóði VR. Framvísa þarf læknisvottorði þess efnis að óvinnufærni hafi varað á þeim tíma sem veikindaréttur hjá eigin rekstri var nýttur. Heimilt er að tekjutengja sjúkradagpeninga við meðallaun. Ekki er heimilt að greiða sjúkradagpeninga samhliða námi.

Sjúkradagpeningar skv. grein þessari greiðast ekki vegna skaðabótaskyldra slysa og atvinnusjúkdóma, þ.m.t. slysa af völdum vélknúinna ökutækja. Gildir það einnig um slys af völdum þeirra vélknúnu ökutækja sem undanþegin eru vátryggingarskyldu samkvæmt 2. mgr. 11. gr. laga nr. 30/2019. Ef sjóðsfélagi vanrækir að kaupa lögbundna tryggingu greiðir Sjúkrasjóður VR ekki slysadagpeninga sem annars hefðu verið greiddir af tryggingafélagi.

2.2 Gögn sem skila skal inn með umsókn um sjúkradagpeninga eru sjúkradagpeningavottorð sem gefið er út á Íslandi, staðfestingu á hvenær veikindarétti hjá atvinnurekanda lýkur. Heimilt er að óska eftir launaseðlum síðustu 12 mánuði fyrir greiðslu sjúkradagpeninga.

2.3 Hvert samfellt greiðslutímabil er 120 dagar á hverju 12 mánaða tímabili. Sá sem hefur fullnýtt þann rétt öðlast hann að nýju þegar greitt hefur verið fyrir hann til sjóðsins í 12 mánuði.

2.4 Við langvarandi veikindi er heimilt að lengja greiðslutímabil dagpeninga í allt að 180 daga samtals ef brýn nauðsyn er til vegna sérstakra ástæðna og fjárhagur sjóðsins leyfir. Við ákvörðun um framlengingu á greiðslutímabili skal taka tillit til hvort sjóðfélagi hefur atvinnutekjur, bætur frá almannatryggingum, bótarétt hjá tryggingafélagi, rétt til tímabundinna örorkugreiðslna frá lífeyrissjóði eða rétt til annarra sjúkrabóta.

2.5 Heimilt er að greiða sjúkradagpeninga vegna veikinda á meðgöngu, enda komi ekki dagpeningagreiðsla fyrir sama tímabil frá öðrum aðilum. Eigi félagsmaður rétt á framlengdu fæðingarorlofi hjá Fæðingarorlofssjóði á hann ekki rétt á sjúkradagpeningum úr sjúkrasjóðnum á sama tíma.

2.6 Foreldrar sem verða fyrir að missa barn yngra en 18 ára eiga rétt á sorgarleyfi skv. lögum nr. 77/2022. Ef sótt er um sjúkradagpeninga á grundvelli þess að óvinnufærni stafi af missi barns undir 18 ára aldri er nauðsynlegt að hafa nýtt rétt til sorgarleyfis áður en til greiðslu sjúkradagpeninga kemur. 

2.7 Dagpeningar eru ekki greiddir eigi félagsmaður rétt á örorkulífeyri.

2.8 Framkvæmdastjórn er heimilt að greiða hluta dagpeninga ef sjóðfélagi getur ekki, vegna sjúkdóms eða slyss, stundað fulla vinnu. Hver dagur sem greitt er fyrir hlutabætur reiknast þó sem heill dagur af þeim 120 eða 180 sem félagsmaður á rétt til hverju sinni.

2.9 Greiðslur dagpeninga skulu miðast við meðallaun bótaþega, miðað við greiðslur til félags og Sjúkrasjóðs VR, síðustu 6 mánuði áður en launagreiðslur féllu niður sbr. 10. gr. í reglugerð Sjúkrasjóðs VR. Í reglugerð kemur fram að ef verulegar breytingar hafa orðið á launum síðustu 6 mánuði er heimilt að meta tekjurnar sérstaklega og þá yfir lengra tímabil en þó aldrei lengra en 12 mánuði. Er þar aðallega átt við þegar félagsmaður lækkar verulega í launum vegna veikinda sinna, getur t.d. ekki unnið reglubundna yfirvinnu sem áður var hluti af launakjörum eða að vinnuhlutfall hefur lækkað vegna heilsubrests. Meðallaun þeirra sem greitt hafa skemur en 6 mánuði til Sjúkrasjóðs VR reiknast skv. eftirfarandi:

2.10 Meðallaun þeirra, sem öðlast hafa rétt til greiðslu dagpeninga úr sjúkrasjóði annars stéttarfélags, skal finna með því að deila í laun á viðmiðunartímabili með fjölda mánaða sem greitt hefur verið í Sjúkrasjóð VR. Meðallaun þeirra sem ekki hafa átt rétt hjá sjúkrasjóði annars stéttarfélags og ekki hafa greitt til félags- og Sjúkrasjóðs VR, skal finna með því að deila í laun á viðmiðunartímabili með 6 mánuðum, þó svo að greitt hafi verið skemur en 6 mánuði. 

2.11 Dagpeningar skulu, að viðbættum bótum almannatrygginga, greiðslum frá Sjúkratryggingum Íslands, greiðslum úr slysatryggingu launafólks eða annarri lögbundinni tryggingu, ekki nema lægri fjárhæð en 80% af meðaltali þeirra heildarlauna sem iðgjald hefur verið greitt af á síðustu 6 mánuðum.

2.12 Dagpeningar greiðast ekki vegna skaðabótaskyldra slysa og atvinnusjúkdóma, þ.m.t. slysa af völdum vélknúinna ökutækja. Sé umsækjandi með opið bótamál hjá tryggingafélagi greiðast ekki dagpeningar.

Sjúkrasjóður VR metur hvort senda eigi umsókn til starfendurhæfingaraðila sem metur hvor starfsendurhæfing sé raunhæf. Ef umsækjandi hafnar starfsendurhæfingu er heimilt að hafna eða afturkalla umsókn um sjúkradagpeninga.

2.13 Sjúkradagpeningar greiðast til foreldra í allt að 120 daga vegna veikinda barna, yngri en 18 ára, enda missi félagsmaður launatekjur vegna þeirra. Greiða skal dagpeninga eftir að veikindarétti lýkur skv. kjarasamningi.

2.14 Við langvarandi veikindi barna er heimilt að lengja greiðslutímabil dagpeninga í allt að 180 daga samtals ef brýn nauðsyn er til vegna sérstakra ástæðna og fjárhagur sjóðsins leyfir. Við ákvörðun um framlengingu á greiðslutímabili skal taka tillit til hvort sjóðfélagi hefur atvinnutekjur, bætur frá almannatryggingum, bótarétt hjá tryggingafélagi eða rétt til annarra sjúkrabóta.

3. gr. Dánarbætur

3.1 VR greiðir dánarbætur við dauðsfall fullgilds félagsfólks og barna þeirra. Bótafjárhæðir fara eftir fjölskyldustærð og hvort viðkomandi var ennþá á vinnumarkaði. Dánarbætur vegna þeirra sem verið er að greiða fyrir til Sjúkrasjóðs VR við dauðsfall eru:

1. Ef hinn látni var giftur greiðast bætur til maka kr. 712.000. Ef hinn látni var ógiftur greiðast kr. 712.000 til þess aðila sem staðfest er að greiðir fyrir útför.

2. Ef hinn látni lætur eftir sig barn (kjör- eða fósturbarn) yngra en 18 ára greiðast vegna hvers barns kr. 800.000 til þess aðila sem sannarlega hefur barnið á sínu framfæri.

3. Að auki greiðist upphæð sem svarar til inneignar viðkomandi í VR varasjóði.

3.2 Heimilt er að greiða dánarbætur 712.000 kr. vegna þeirra sem látið hafa af störfum við 60 ára aldur eða síðar hafi það verið fullgilt félagsfólk í samfellt 5 ár áður en það lét af störfum eins og það er skilgreint í 3. gr. laga VR. Réttur þessi fellur niður 24 mánuðum eftir að það verður eldra félagsfólk eins og það er skilgreint í 3. gr. laga VR.

3.3 Dánarbætur vegna barna félagsfólks yngri en 18 ára eru 712.000 kr.

3.4 Rétthafar dánarbóta:

1. Eftirlifandi maki.
2. Börn hins látna eða sá sem annast framfærslu barna að fullu.
3. Aðrir ef þeir bera kostnað af útför.
4. Dánarbætur barna félagsfólks. Rétthafi dánarbóta er félagsmaður sem missir barn sitt.

4. gr. Styrkir

4.1 Framkvæmdastjórn er heimilt að meta þörf og aðstæður félagsmanna og fyrrverandi félagsmanna í sjúkra-, elli- og örorkutilvikum og getur í slíkum tilvikum samþykkt styrkveitingar.

4.2 Heimilt er að greiða styrk vegna langvarandi veikinda maka eða barna sjóðfélaga, enda missi sjóðfélagi launatekjur vegna þeirra, skv. verklagsreglum.

4.3 Heimilt er að greiða styrk, sem svarar sjúkradagpeningum samtals í allt að 120 daga, vegna sjúkdóms sem stafar af ofneyslu áfengis eða vímuefna.

4.4 Sjúkrasjóður VR greiðir styrk til félagsmanna vegna líf-, slysa- og sjúkdómatrygginga, tannlækninga, sálfræðihjálpar, líkamsræktar, endurhæfingar og kostnað vegna hjálpartækja s.s. gleraugna- og heyrnartækja, í gegnum VR varasjóð.

4.5 Sjúkrasjóður VR greiðir styrki vegna glasafrjóvgana/tæknifrjóvgana og ættleiðingar, að hámarki 250. þús. kr. fyrir hvern félagsmann, eftir 6 mánaða samfellda greiðslu iðgjalda fyrir upphafsdag meðferðar sem sótt er um.

4.6 Styrkir vegna veikinda maka. Heimilt er að greiða styrk sem samsvarar heildarupphæð sjúkradagpeninga í 3 mánuði. 

4.7 Sjóðfélagi sem er fullgildur félagi í VR og hefur greitt iðgjald til sjóðsins í 12 af síðustu 18 mánuðum fyrir fæðingu barns á rétt á fæðingarstyrk að upphæð kr. 100.000 vegna hvers barns. Styrkurinn nær einnig til ættleiðinga barna yngri en 18 ára. 

Foreldri/sjóðfélagi þarf vera í fæðingarorlofi til að eiga rétt á styrk og taka a.m.k. 75% fæðingarorlof, sem hann á rétt á, hjá Fæðingarorlofssjóði. 

Mögulegt er að nýta styrkinn upp að 24 mánaða aldri barns/barna. Með umsókn þarf að fylgja staðfesting frá Fæðingarorlofssjóði um töku fæðingarorlofs, þar sem hlutfall og lengd fæðingarorlofs koma fram. Skilyrði fyrir fæðingastyrk er að greitt sé iðgjald til VR af fæðingarorlofsgreiðslum. Greiðsla fæðingarstyrks getur fyrst átt sér stað eftir að greiðsla félagsgjalds af fæðingarorlofsgreiðslum hefur borist félaginu.

4.8 Allir styrkir sem þannig eru afgreiddir hjá starfsmönnum Sjúkrasjóðs á skrifstofu VR skulu háðir samþykki sviðsstjóra og vera í samræmi við skráðar verklagsreglur.

4.9. Stjórn VR ákveður árlegt fjárframlag til styrkja komandi árs í lok hvers árs. Framkvæmdastjórn Sjúkrasjóðs VR hefur eftirlit með styrkveitingum úr sjóðnum.

5. gr. Samskipti sjúkrasjóða

5.1 Sá sem öðlast hefur rétt til greiðslu úr sjúkrasjóði eins aðildarfélags innan ASÍ eða BSRB öðlast rétt hjá Sjúkrasjóði VR, skv. 2. gr., eftir að greitt hefur verið vegna hans til sjóðsins í einn mánuð, enda hafði hann fram að því átt rétt hjá fyrra félaginu. Starfsmenn Sjúkrasjóðs VR skulu eftir fremsta megni leiðbeina umsækjendum um sjúkradagpeninga um þau mögulegu réttindi er þeir kunna að eiga hjá öðrum aðilum, stofnunum og félögum.

5.2. Vinni umsækjandi á fleirum en einum vinnustað og hafi verið greitt í fleiri en einn sjúkrasjóð þegar sótt er um greiðslu, skal hann greina frá í hvaða sjóði greitt hefur verið vegna hans. Heimilt er að fresta greiðslu bóta þar til staðfesting annarra sjóða liggur fyrir um að umsækjandi hafi ekki sótt um greiðslur þaðan. Sjúkrasjóðurinn skal leita slíkrar staðfestingar og gefa öðrum sjóðum yfirlit um bætur sem greiddar eru vegna umsækjandans, tegund og fjárhæð bóta.

6. gr. Önnur atriði

6.1 Framkvæmdastjórn Sjúkrasjóðs VR er heimilt, að fengnu samþykki stjórnar VR, að semja um tryggingar vegna félagsmanna VR, s.s. hóplíftryggingu, frítímaslysatryggingu, sjúkradagpeningatryggingu, slysatryggingu barna félagsmanna o.fl.

6.2 Innheimtu tekna Sjúkrasjóðs VR annast Lífeyrissjóður verzlunarmanna skv. samkomulagi þar um.

6.3 Bætur úr Sjúkrasjóði VR greiðast mánaðarlega og skulu umsóknir berast á eyðublöðum sem liggja frammi á skrifstofu og vef VR, ásamt nauðsynlegum vottorðum fyrir 20. hvers mánaðar til að greiðsla geti borist 1. dag mánaðarins á eftir. Berist ekki fullnægjandi gögn eða upplýsingar skal ákvörðun um samþykki eða höfnun frestað þar til umbeðin gögn berast.

6.4 Allar umsóknir skulu samþykktar af sviðsstjóra eða framkvæmdastjóra áður þær eru greiddar. 

6.5 Séu iðgjöld atvinnurekanda umsækjandans í Sjúkrasjóð VR í vanskilum og umsækjandi er forsvarsmaður atvinnurekenda, maki, skyldmenni eða nákominn að öðru leyti, er Sjúkrasjóði VR heimilt að hafna umsókninni.

6.6 Réttur til bóta miðast við greiðslu iðgjalds. Óheimilt er að skapa sér rétt til bóta með greiðslu iðgjalda aftur í tímann (sbr. 9.gr. reglugerðar Sjúkrasjóðs VR).

6.7 Upplýsingar sem skráðar eru í kerfi Sjúkrasjóðs VR eru persónugreinanlegar upplýsingar og heyra undir lög um persónuvernd. Farið er með allar upplýsingar í kerfinu sem trúnaðarmál. Með undirskrift umsóknar um bætur veitir félagsmaður félaginu rétt til þess að afla frekari gagna sem afgreiðsla umsóknarinnar getur byggt á, s.s. upplýsingar um tekjur og tekjuskatt, og samþykkir að trúnaðarlæknar félagsins hafi aðgang að öllum læknisfræðilegum upplýsingum og geti kallað viðkomandi til viðtals.

6.8 Sá sem reynir að afla sér bóta með því að gefa rangar eða villandi upplýsingar, leynir eða lætur hjá líða að tilkynna um breytingar á högum sínum eða heilsu sem áhrif hefur á réttindi að fullu eða hluta samkvæmt þessum starfsreglum skal missa rétt til bóta úr sjóðnum. Heimilt er að endurkrefja bótaþega um þegar greiddar bætur/dagpeninga sem aflað er með sviksamlegum hætti auk dráttarvaxta og innheimtukostnaðar. Réttur til er háður því að endurgreiðsla ranglega greiddra dagpeninga og annarra bóta hafi farið fram. Áður en félagi er sviptur bótarétti skal veita honum rétt til andmæla. Tilkynna skal félaga með sannanlegum hætti ef hann er sviptur bótarétti.

Ákvæði til bráðabirgða:
Breytingar samþykktar með fyrirvara um samþykki aðalfundar VR 25. mars 2026 um breytingar á reglugerð Sjúkrasjóðs VR.
Réttur til greiðslu sjúkradagpeninga breytist frá og með 1. maí 2026.
Breyting á dánarbótum eldri félaga taka gildi frá og með 1. maí 2026 og er þá miðað við dánardag.
Réttur til greiðslu á fæðingastyrk verður virkur frá og með samþykkt aðalfundar VR 25. mars 2026 er þá miðað við fæðingardag barns.

(Samþykkt í stjórn VR 24.09.79, með áorðnum breytingum 01.04.85, 28.11.85, 01.12.88, 09.03.89, 
22.11.89, 09.02.94, 30.08.94, 28.12.94, 23.05.95, 20.06.95, 13.06.97, br. á gr. 2.1 og 2.7, sem gildir frá 01.07.97 og 18.02.98, br. á gr. 2.9, sem gildir frá 01.01.98. 16.04.98 samþykkti stjórn VR breytingar á flestum greinum og nýjar bættust við, þessar breytingar gilda frá 01.05.98, með áorðnum breytingum 13.04.1999 á 3. og 5. gr., sem gilda frá 01.04.99 og 07.09.99, br. á gr. 5.1, sem gildir frá 01.09.99 og 06.06.2000, br. á gr. 5.5, 5.6 og 5.7, sem gilda frá 01.05.2000 og br. á gr. 6.4,sem gildir frá 01.06.2000 og br. á gr. 2.8, 3.2, 4.1, 6.4, 6.5 og 6.6, sem gildir frá 01.04.01. Þann 13. október samþykkti stjórn VR breytingar á gr. 3.1 og 3.3. sem gilda frá þeim tíma. Þann 9. febrúar 2005 samþykkti stjórn VR breytingar á gr. 2.2., 2.7 og 5.4. Þann 13. apríl 2005 samþykkti stjórn VR nýjar greinar, gr. 7.4 og gr. 7.5 sem gilda frá og með þeim tíma. Þann 24. apríl 2006 samþykkti aðalfundur breytingar á gr. 3.1 og 5.4. Þann 9. maí 2007 samþykkti stjórn breytingar á greinum 2.1, 2.6, 4.4, 4.5, 5.5, 6, 6.1, 6.2, 6.3, 6.4,8.3, 8.4, 8.5, 8.6, 8.7 og 8.8. Þann 10.09.2008 samþykkti stjórn breytingar á gr. 2.3, 5.3 og 8.7. Þann 8. október 2008 samþykkti stjórn breytingar á gr. 2.5 og 3.2. Stjórn samþykkti á fundi sínum þann 12. maí 2010 breytingar á 6. gr. Framkvæmdastjórn samþykkti breytingar á gr. 2.7 og 6.1 þann 4. janúar 2011. Stjórn VR samþykkti breytingar á gr. 2.5 þann 20. mars 2013, Framkvæmdastjórn samþykkti breytingar á gr. 2.1,2.2,2.3.,2.7 og 8.8 þann 13.08 2013 til 
framkvæmdar eftir aðalfund 26.03 2014. Ákvæði til bráðabirgða Gr. 2.7, 3.1 1. og 2. tl., 4.1, 4.3, 5.5; Þessar greinar taka gildi frá og með 1. júlí 2015 en þangað til gilda eldri reglur. Framkvæmdastjórn og stjórn VR samþykkti breytingar á gr. 3.1 þann 14.12 2016 til framkvæmdar frá 01.01 2017
Stjórn VR samþykkti breytingar á gr. 4.1 þann 7. júní, 2017
Stjórn VR samþykkti breytingar á gr. 3 og gr. 7.4 þann 13. september 2023).
Framkvæmdastjórn VR samþykkti breytingar á gr. 2.1 12. desember 2023.
Stjórn VR samþykkti breytingar á gr. 3 ásamt nýrri grein 2.4 þann 13. desember 2023.
Stjórn VR samþykkti breytingar á gr. 5.5 þann 14. febrúar 2024
Stjórn VR samþykkti breytingar á gr. 5.6 þann 3. desember 2025
Stjórn samþykkti breytingar á fjölda daga í 180 (120+60), 80% að meðtöldum öðrum bótum, heimild til mats á starfsendurhæfingu þann 11. febrúar 2026

Sjúkrasjóður VR

Í Sjúkrasjóð VR geta félagsmenn sótt um sjúkradagpeninga, slysabætur, dánarbætur og aðra styrki.

Smellið hér að neðan til að fá frekari upplýsingar um Sjúkrasjóð VR.

Sjá nánar hér.