Efnahagsyfirlit - 13.09.2019
Það er vinnuvikan sem skiptir máli
Margir mismunandi mælikvarðar eru til fyrir vinnutíma launafólks; hægt er að mæla lengd vinnuvikunnar, vinnutíma á mánuði eða vinnutíma á ársgrundvelli. En þegar verið er að tala um vinnutíma Íslendinga er eðlilegast að miða við hefðbundna vinnuviku fólks í fullu starfi. Það er lengd vinnuvikunnar sem hefur áhrif á jafnvægi vinnu og einkalífs, álag og streitu svo fátt eitt sé nefnt. Og það er vinnuvikan sem VR samdi um að stytta. Um þetta er fjallað í nýjasta Efnahagsyfirliti VR.
Vinnutíminn á Íslandi
Í Efnahagsyfirlitinu eru birtar tölur yfir lengd hefðbundinnar vinnuviku fullvinnandi launafólks í aðildarríkjum OECD en þar er Ísland með áttundu lengstu vinnuvikuna. Hin Norðurlöndin eru öll mun neðar á lista. Ársvinnutími, eins og Samtök atvinnulífsins fjölluðu nýverið um, er ekki marktækur mælikvarði þegar verið er að skoða vinnuvikuna á Íslandi í samanburði við aðra. Hefðbundin vinnuvika á Íslandi er lengri en í nágrannalöndunum, það sýna tölurnar.
Áhrif nýrra tekjuskattsbreytingar
Í yfirlitinu er einnig umfjöllun um áhrif breytinga á tekjuskattskerfinu á útborguð laun, en þær breytingar voru kynntar með fjárlögum fyrir árið 2020. Þar er birt tafla sem sýnir hvernig tekjuskattskerfi einstaklinga mun líta út að lokinni innleiðingu breytinganna árið 2021.
