Kosningar til formanns og stjórnar VR 2019-2021

Kjörstjórn VR auglýsir, samkvæmt 20. gr. laga VR, eftir einstaklingsframboðum til formanns, stjórnar og listaframboðum í trúnaðarráð VR kjörtímabilið 2019 - 2021.

Um er að ræða annars vegar einstaklingskosningu til formanns, til sjö sæta í stjórn VR og þriggja til vara og hins vegar listaframboð fyrir 41 sæti í trúnaðarráð.
Auglýsing eftir framboðum birtist í dagblöðum föstudaginn 1. febrúar 2019 og á vef félagsins.

Framboðsfrestur rennur út kl. 12:00 á hádegi mánudaginn 11. febrúar 2019.

Um hvað verður kosið?

20. grein laga VR fjallar um kosningu formanns, stjórnar, varastjórnar og trúnaðarráðs. Í allsherjarkosningu árið 2019 verður kosið um formann, sjö sæti í stjórn og þrjú í varastjórn til tveggja ára í einstaklingskosningu.

Í lögunum segir að stjórn og trúnaðarráð skuli stilla upp 41 manns lista til trúnaðarráðs til tveggja ára og hefur uppstillinganefnd stjórnar og trúnaðarráðs auglýst eftir einstaklingsframboðum á listann. Berist önnur listaframboð til trúnaðaráðs verður kosið milli lista.

Hvernig á að bjóða sig fram?

Skv. 5. gr. laga VR njóta allir fullgildir félagsmenn kjörgengis til trúnaðarstarfa innan félagsins, með þeim undantekningum sem getið er um í 3. gr. laganna en samkvæmt þeirri grein njóta unglingar 15 ára og yngri, sjálfstætt starfandi á vinnumarkaði og þeir sem hættir eru störfum vegna aldurs eða örorku ekki kjörgengis.

Þá er vakin athygli á að skv. 11. gr. laga VR skulu stjórnarmenn vera fjár síns ráðandi, uppfylla almenn hæfisskilyrði og mega ekki á sl. 5 árum hafa hlotið fangelsisdóm fyrir refsiverðan verknað. Stjórnarmenn mega ekki eiga meira en 5% hlut í hlutafélagi sem er í atvinnurekstri á starfssviði félagsins. Frambjóðendur til stjórnar þurfa því á grundvelli þessa ákvæðis að láta fylgja framboðum sínum trúnaðaryfirlýsingu um að þeir uppfylli þessi skilyrði.

Skrifleg meðmæli 15 félagsmanna þarf vegna einstaklingsframboðs til stjórnar. Til að listi til trúnaðarráðs sem borinn er fram gegn lista uppstillingarnefndar sé löglega fram borinn þarf skrifleg meðmæli 328 félagsmanna sem og skriflegt samþykki frambjóðenda á listanum. Fyrirmyndir að meðmælendablöðum má nálgast hér:

Vakin er athygli á því að framboðum þurfa að fylgja upplýsingar um nafn og kennitölu frambjóðenda. Enn fremur óskar kjörstjórn eftir því að framboðum fylgi upplýsingar um símanúmer og netfang frambjóðenda til stjórnar og forsvarsmanna lista.

Framboðsfrestur er til kl. 12:00 á hádegi, mánudaginn 11. febrúar 2019.

Framboðum ásamt fullnægjandi fjölda meðmælenda skal skila á skrifstofu VR, Húsi verslunarinnar, Kringlunni 7,
1. hæð, merkt Kjörstjórn VR.

Frekari upplýsingar má fá hjá kjörstjórn með því að hringja í síma VR 510 1700 eða senda tölvupóst á kjorstjorn@vr.is.

1. febrúar 2019
Kjörstjórn VR

Framboðsfrestur er til kl. 12:00 á hádegi,  mánudaginn 11. febrúar 2019.

Frekari upplýsingar má fá hjá kjörstjórn með því að hringja í síma VR 510 1700 eða senda tölvupóst á kjorstjorn@vr.is.