Almennar fréttir - 14.10.2025
Aðalfundur deildar leiðsögufólks í VR 2025
Aðalfundur deildar leiðsögufólks í VR verður haldinn þriðjudaginn 28. október 2025 kl. 20:00 í sal VR á 9. hæð í Húsi verslunarinnar. Fundurinn verður bæði stað- og fjarfundur. Félagsfólk deildarinnar verður að skrá sig fyrir fram fyrir kl. 12:00 á hádegi á fundardegi.
Allt fullgilt félagsfólk deildar leiðsögufólks í VR getur sótt fundinn. Fullgilt félagsfólk er það sem greitt hefur a.m.k. 11.365 kr. alls í félagsgjöld á sl. 12 mánuðum, að meðtöldum greiðslum til Leiðsagnar – félags leiðsögumanna, ásamt því að hafa greitt félagsgjöld fyrir a.m.k. einn mánuð frá júní – ágúst ´25. Yfirlit yfir greidd félagsgjöld er hægt að sjá á Mínum síðum á vr.is og skráning í deild leiðsögufólks í VR fer fram á Mínum síðum á vr.is undir umsóknir.
Túlkun á ensku verður einungis í boði á Teams. Félagsfólk sem þarfnast túlkunar á staðfundi, vinsamlega komið með viðeigandi búnað og heyrnartól.
Kosningar á fundinum verða ýmist með handauppréttingu eða rafrænar og fundargögn eru rafræn. Mikilvægt er að öll sem mæta á fundinn hafi meðferðis viðeigandi búnað (tölvu eða snjalltæki) til þess að geta tekið þátt í kosningum.
Á dagskrá eru hefðbundin aðalfundarstörf samkvæmt starfsreglum deildar. Þá verða greidd atkvæði um tillögur að siðareglum leiðsögufólks og samþykkt fjárhagsáætlun deildarinnar fyrir 2026.
