VR blaðið

27.09.2019

3. tbl VR blaðsins 2019

Í þessu þriðja tölublaði ársins er megin áherslan á styttingu vinnuvikunnar sem samið var um fyrir VR félaga í síðustu kjarasamningum. Helstu upplýsingar og dæmi um útfærslumöguleika styttingar má finna á bls. 6 - 7. En einnig er fjallað um þann ávinning sem verður af styttingu í áhugaverðri grein eftir Ragnheiði Agnarsdóttur eiganda Heilsufélagsins á bls. 4. Þar fer hún einnig yfir 6 skref að vel heppnaðri innleiðingu á styttingu vinnutíma. Þessu til viðbótar, á bls. 9, er rætt við tvo trúnaðarmenn um styttingu vinnuvikunnar og hvort farið sé að ræða útfærslu þess á þeirra vinnustöðum. Fjallað er um, á bls. 10, nýtt fagnám verlsunar og þjónustu – Menntagátt – sem Starfsmenntasjóður verslunar- og skrifstofufólks hefur unnið að því að þróa fyrir starfsfólk í verslun og þjónustu og þá er einnig sagt frá áhugaverðum námskeiðum fyrir félagsmenn VR sem haldin verða á haustönn í húsakynnum VR. Loks er grein á bls. 14 um bestu árin eftir Ásgeir Jónsson sem hefur undanfarin ár haldið feykivinsæl námskeið fyrir félagsmenn VR sem eru að huga að starfslokum.

01.06.2019

2. tbl. VR blaðsins 2019

Annað tölublað ársins af VR blaðinu er komið út og er því í þetta sinn dreift til félagsmanna með Fréttablaðinu. Í þessu öðru tölublaði ársins, sem verður dreift þann 1. júní, beinum við sjónum okkar að úrslitum í könnuninni um Fyrirtæki ársins 2019. Nánari upplýsingar um þau fyrirtæki sem fengu viðurkenningu þetta árið má finna á bls. 8. Fjallað er um nýja kjarasamninga, Lífskjarasamningana, sem voru samþykktir með yfirgnæfandi meirihluta hjá VR. Þá er, á bls. 12 – 13, ítarleg umfjöllun um styttingu vinnuvikunnar, sem náðist að semju um í síðustu kjarasamningaviðræðum. Úrslit stjórnarkosninga VR eru kynnt, fjallað er um fagnám í Viðskiptafræði og verslunarstjórnun og sagt frá gríðarlegri stemningu á fjölskylduhátíð VR þann 1. maí.

08.03.2019

1. tbl. VR blaðsins 2019

Fyrsta tölublað VR blaðsins ársins 2019 er komið út og er því dreift til félagsmanna í pósti. Í þessu fyrsta tölublaði ársins beinum við sjónum okkar að kosningum í félaginu en 13 einstaklingar eru í kjöri til stjórnar VR fyrir tímabilið 2019-2021. Nánari upplýsingar um frambjóðendur og kosningarnar má finna á bls.16-24. Fjallað er um Vinnustaðaeftirlit VR en markmið slíks eftirlits og vinnustaðaskírteina er að tryggja að atvinnurekendur og starfsmenn þeirra fari að gildandi lögum, reglugerðum og kjarasamningum. Árni Sverrir Hafsteinsson fjallar um tækninýjunar í afgreiðslustörfum í grein sinni „Verslunarstörf framtíðarinnar“. Einnig er umfjöllun í blaðinu um tekjusögu Íslendinga og nýjan vef, tekjusagan.is en þar er meðal annars hægt að skoða kaupmáttarþróun ólíkra hópa. Félagsmenn eru minntir á könnun VR á Fyrirtæki ársins, nánari upplýsingar er að finna í þessu nýjasta tölublaði VR blaðsins. Stútfullt blað eins og venjulega, ekki missa af því!

06.12.2018

4. tbl. VR blaðsins 2018

Síðasta tölublað VR blaðsins á árinu er í tímaritaformi og er því dreift til félagsmanna VR. Eins og venja er á þessum árstíma er farið yfir réttindi félagsmanna í desember enda sérlega mikilvægt að launafólk sé meðvitað um hvíldartíma, laun á frídögum og annað þess háttar, nú sem endranær. Í blaðinu er fjallað um kröfugerð VR og LÍV gagnvart SA og þá er einnig farið yfir þær kröfur sem VR gerir á stjórnvöld í komandi kjarasamningaviðræðum. Þá fjallar formaður VR, Ragnar Þór Ingólfsson, um hvernig krónutöluhækkun skilar sér til félagsmanna VR. Í blaðinu er að finna viðtal við Ragnheiði Guðfinnu Guðnadóttur hjá Forvörnum ehf, en hún stýrir umræðuhópum fyrir karla sem hafa farið í gegnum kulnun í starfi. VR hefur um nokkurt skeið unnið að því að gera hæfni félagsmanna sinna sýnilega og fá hana metna til launa. Farið er nánar yfir málið í VR blaðinu í grein sem ber heitið „VR styður verslunarfólk til starfsþróunar.“

21.09.2018

3. tbl. VR blaðsins 2018

Þriðja tölublað VR blaðsins er komið út og er því dreift um allt land með Fréttablaðinu. Magnús L. Sveinsson, fyrrverandi formaður VR, ræðir við ritstjóra VR blaðsins um komandi kjarabaráttu en Magnús man svo sannarlega tímana tvenna í þeim efnum. Mikil aukning hefur átt sér stað í sjúkrasjóði VR á undanförnum árum og er farið yfir stöðuna í blaðinu. Sigrún Ása Þórðardóttir, sálfræðingur hjá Heilsuborg og Erla Gerður Sveinsdóttir, læknir hjá Heilsuborg, fjalla um mikilvægi þess að sofa og hvílast vel í grein sinni „Skipuleggur þú líf þitt á nóttunni?“ Fyrir hverja er VR? Svörin við því er að finna í þessu nýjasta tölublaði VR blaðsins. Stútfullt blað af frábærum fróðleik, ekki missa af því! Athugið að krossgátan verður á sínum stað í jólablaði VR blaðsins.

30.05.2018

2. tbl. VR blaðsins 2018

Annað tölublað VR blaðsins fyrir árið 2018 hefur litið dagsins ljós en það er með breyttu sniði en venjulega og er því dreift með aldreifingu um allt land. Í blaðinu er að finna viðtal við Evu Ruzu, skemmtikraft, en hún tók þátt í hátíðarhöldum VR í tilefni af alþjóðlegum baráttudegi verkalýðsins þann 1. maí sl. Starfsmenntasjóðirnir eru kynntir og viðtöl tekin við þrjá einstaklinga sem hafa nýtt sér þjónustu þeirra. Rætt er við Stein Sigurðarson en hann þakkar fyrir að hafa verið félagsmaður VR og getað nýtt Sjúkrasjóð VR eftir alvarleg veikindi. Þá er viðtal við formann VR, Ragnar Þór Ingólfsson, en þar ræðir hann meðal annars um bernskuárin í Breiðholti og fjölskylduna. Stúfullt blað af spennandi efni! Athugið að krossgátan verður á sínum stað í jólablaði VR blaðsins.

02.03.2018

1. tbl. VR blaðsins 2018

Í fyrsta tölublaði ársins 2018 er áhersla lögð á að kynna frambjóðendur til stjórnar VR fyrir kjörtímabilið 2018-2020 en kosningar í félaginu standa yfir frá 6.-13. mars. Í blaðinu verða einnig kynntar niðurstöður viðamikillar könnunar sem VR gerði í desember og janúar síðastliðnum. Í könnuninni var spurt hvort viðkomandi hefði orðið fyrir kynferðislegri áreitni eða orðið vitni að kynferðislegri áreitni á vinnustað sínum. Þá verður umfjöllun um nýtt diplómanám í viðskiptafræði og verslunarstjórnun og viðtal við Kristjönu Katrínu Þorgrímsdóttur, verkefnastjóra námsins. Í blaðinu er einnig viðtal við
dr. Ólaf Þór Ævarsson um streitu, einkenni hennar og hvernig hægt sé að bregðast við vinnutengdri streitu. 

01.12.2017

4. tbl. VR blaðsins 2017

Réttindamálin eru í brennidepli í þessu 4. tölublaði VR blaðsins árið 2017. Fjallað er um fjórðu iðnbyltinguna og þær áskoranir og tækifæri sem felast í henni. Farið er yfir nokkur streituráð fyrir veturinn og minnt á réttindi félagsmanna í desember. Í blaðinu er viðtal við Ragnar Þór Ingólfsson, formann VR, um fyrsta ár hans í formannsstólnum og hvað sé framundan í kjaramálunum. Skrifstofur VR á Akranesi voru heimsóttar og  rætt við fjóra félagsmenn á svæðinu. Þá var nýr trúnaðarmaður VR hjá Costco tekinn tali en starfsfólk Costco kaus á dögunum tvo trúnaðarmenn fyrir verslunina.

29.09.2017

3 tbl. VR blaðsins 2017

Starfsmenntamálin eru í brennidepli í þessu  3. tölublaði VR blaðsins 2017.  Fjallað er um raunfærnimat og hvernig aukin fræðsla skilar ávinningi fyrir fólk á vinnumarkaði. Farið er yfir hvað þjónusta er og hvað starfsfólki í verslunum finnst einkenna góða þjónustu. Ragnar Þór Ingólfsson, formaður VR, fer yfir stöðuna í kjaramálum og skrifar einnig leiðara blaðsins. Fjallað er um þrælahald á Íslandi og mikilvægi vinnustaðaeftirlits. Skrifstofur VR á Suðurlandi voru heimsóttar, trúnaðarmaður á Suðurlandi tekinn tali og rætt við fjóra félagsmenn á svæðinu. 

19.06.2017

2 tbl. VR blaðsins 2017

Í 2. tölublaði VR blaðsins árið 2017 eru vinningshafar í Fyrirtæki ársins kynntir. Í blaðinu er að finna viðtöl við stjórnendur fyrirtækjanna sem hlutu titilinn Fyrirtæki ársins 2017 og myndir af vinnustöðunum. Í blaðinu er einnig að finna viðtal við nýjan formann VR, Ragnar Þór Ingólfsson, en Ragnar Þór sat í átta ár í stjórn félagsins áður en hann var kjörinn formaður á aðalfundi VR 28. mars síðastliðinn. Einnig er umfjöllun um deild VR í Vestmannaeyjum þar sem meðal annars er rætt við félagsmenn á svæðinu og trúnaðarmaður VR í Bónus tekinn tali. Þá skrifar Gils Einarsson, nýkjörinn formaður Suðurlandsdeildar VR, um sameiningu VMS við VR og nýja tíma fyrir félagsmenn á svæðinu.